---
title: "വാണിമേലിലെ റന ഫാത്തിമയ്ക്ക് ആട്യ -പാട്യ മത്സരത്തിൽ വീണ്ടും ദേശീയ മെഡൽ"
english_title: "Singing and dancing competition, national medal, native of Vanimel"
publisher: "nadapuramnews.in"
canonical_url: "https://nadapuram.truevisionnews.com/news/331771/singing-and-dancing-competition-national-medal-native-of-vanimel"
published_at: "2025-12-18T12:47:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6943ab28d3313_NADA3.jpg"
keywords: []
---

# വാണിമേലിലെ റന ഫാത്തിമയ്ക്ക് ആട്യ -പാട്യ മത്സരത്തിൽ വീണ്ടും ദേശീയ മെഡൽ

> **Lead Summary:** **നാദാപുരം: [[nadapuram.truevisionnews.com]]**പഞ്ചാബിൽ വച്ച് നടന്ന ആട്യ- പാട്യ ദേശീയ ജൂനിയർ ചാമ്പ്യൻഷിപ്പിൽ കേരളത്തെ പ്രതിനിധീകരിച്ച വാണിമേൽ സ്വദേശിനി റന ഫാത്തിമയ്ക്ക് വെള്ളിമെഡൽ ലഭിച്ചു.

## Article Content

**നാദാപുരം: [[nadapuram.truevisionnews.com]]**പഞ്ചാബിൽ വച്ച് നടന്ന ആട്യ- പാട്യ ദേശീയ ജൂനിയർ ചാമ്പ്യൻഷിപ്പിൽ കേരളത്തെ പ്രതിനിധീകരിച്ച വാണിമേൽ സ്വദേശിനി റന ഫാത്തിമയ്ക്ക് വെള്ളിമെഡൽ ലഭിച്ചു.

രണ്ടാം തവണയാണ് വാണിമേൽ ബിഎംഎ സ്പോർട്സ് അക്കാദമിയിലെ താരമായ റന ഫാത്തിമ ദേശീയതലത്തിൽ മെഡൽ നേടുന്നത്. ജൂനിയർ താരമായിരുന്നിട്ടു കൂടി നേരത്തെ സീനിയർ വിഭാഗത്തിൽ കേരളത്തെ പ്രതിനിധീകരിച്ച് റന വെള്ളിമെഡൽ നേടിയിരുന്നു.

നിലവിൽ കണ്ണൂർ ജില്ല ആട്യ- പാട്യ വനിത ടീം ക്യാപ്റ്റൻ കൂടിയായ റന വാണിമേൽ കല്ലിൽ അബ്ദു റഹ്മാൻ്റെയും മുബീനയുടെയും മകളാണ്.വാണിമേൽ ക്രെസെന്റ് ഹൈസ്കൂളിൽ പ്ലസ്ടു സയൻസ് വിഷയത്തിൽ രണ്ടാം വർഷ വിദ്യാർത്ഥിയാണ് റന ഫാത്തിമ .

കേരളത്തിലെയും ദക്ഷിണേന്ത്യയിലെയും ഗ്രാമങ്ങളിൽ പണ്ട് വളരെ പ്രചാരത്തിലുണ്ടായിരുന്ന ഒരു നാടൻ കളിയാണ് ആട്യാ-പാട്യാ ,കബഡിക്ക് സമാനമായ ചില നിയമങ്ങളുണ്ടെങ്കിലും ഇത് തികച്ചും വ്യത്യസ്തമായ ഒരു വിനോദമാണ്.

സാധാരണയായി 9 പേർ അടങ്ങുന്ന രണ്ട് ടീമുകളാണ് ഇതിൽ മത്സരിക്കുന്നത്. ഒരു ടീം ആക്രമിക്കുന്നവരും മറ്റേ ടീം പ്രതിരോധിക്കുന്നവരും ആയിരിക്കും. നീളമുള്ള ഒരു മൈതാനത്താണ് കളി നടക്കുന്നത്.

ഇതിൽ കൃത്യമായ ഇടവേളകളിൽ കുത്തനെയുള്ള വരകൾ ഉണ്ടായിരിക്കും.മൈതാനത്തിന്റെ ഒരു വശത്തുനിന്ന് ആരംഭിച്ച്, ഓരോ വരകളിലും നിൽക്കുന്ന പ്രതിരോധക്കാരെ വെട്ടിച്ച് അവസാന വരി വരെ എത്തുകയാണ് ആക്രമിക്കുന്ന ടീമിന്റെ ലക്ഷ്യം.

പ്രതിരോധിക്കുന്ന ടീമിലെ ഓരോ കളിക്കാരനും തനിക്ക് നിശ്ചയിച്ചിട്ടുള്ള വരയിലൂടെ മാത്രമേ നീങ്ങാൻ പാടുള്ളൂ. അവർക്ക് മുന്നോട്ടോ പിന്നോട്ടോ വരാൻ അനുവാദമില്ല, വശങ്ങളിലേക്ക് മാത്രമേ നീങ്ങാൻ കഴിയൂ.

ഈ വരകളിൽ നിൽക്കുന്നവർ തൊടാതെ വേണം അപ്പുറത്തെ വശത്തെത്താൻ. ഒരാൾ പിടിക്കപ്പെട്ടാൽ ആ ടീമിന് പോയിന്റ് നഷ്ടപ്പെടുകയോ അല്ലെങ്കിൽ കളിയിൽ നിന്ന് പുറത്താവുകയോ ചെയ്യും.ഇതിനെ 'വരകളിലെ കളി' എന്നും വിശേഷിപ്പിക്കാറുണ്ട്.

ശരീരത്തിന്റെ വേഗതയും പെട്ടെന്ന് വെട്ടിച്ചു മാറാനുള്ള ബുദ്ധിയുമാണ് ഈ കളിക്കാരന് വേണ്ട പ്രധാന ഗുണങ്ങൾ. കബഡി പോലെ തന്നെ ഇതിനും പ്രത്യേകമായ ശ്വാസം വിടാതെയുള്ള വിളികൾ (Chant) ചിലയിടങ്ങളിൽ ഉപയോഗിക്കാറുണ്ട്.

ദേശീയ തലത്തിൽ ഇതിനായി അസോസിയേഷനുകളും മത്സരങ്ങളും നിലവിലുണ്ട്.അന്തർ ദേശിയ തലത്തിലും മത്സരം ഈ ഗെയിമിന് ഉണ്ട്‌.

### Related Links & Sources
- [Original Story Source](https://nadapuram.truevisionnews.com/news/331771/singing-and-dancing-competition-national-medal-native-of-vanimel)