---
title: "സംസ്ഥാന വനമിത്ര പുരസ്കാരം ഡോ. പി. ദിലീപ് കോട്ടേമ്പ്രത്തിന്; വനംവകുപ്പ് മന്ത്രിയിൽ നിന്ന് അവാർഡ് ഏറ്റുവാങ്ങി"
english_title: "Dr. P. Dilip Kottembram received the State Vanamitra Award"
publisher: "nadapuramnews.in"
canonical_url: "https://nadapuram.truevisionnews.com/news/364206/dr-p-dilip-kottembram-received-the-state-vanamitra-award"
published_at: "2026-06-06T11:54:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6a23bd63cff9f_NADA3.jpg"
keywords: ["Latest News", "Nadapuram", "Dr. P. Dilip Kottempram", "State Vanamitra Award"]
---

# സംസ്ഥാന വനമിത്ര പുരസ്കാരം ഡോ. പി. ദിലീപ് കോട്ടേമ്പ്രത്തിന്; വനംവകുപ്പ് മന്ത്രിയിൽ നിന്ന് അവാർഡ് ഏറ്റുവാങ്ങി

> **Lead Summary:** **ഇരിങ്ങണ്ണൂർ: [**പരിസ്ഥിതി സംരക്ഷണ രംഗത്തെ മികച്ച പ്രവർത്തനങ്ങൾ പരിഗണിച്ച് സംസ്ഥാന സർക്കാർ ഏർപ്പെടുത്തിയ 2025-ലെ വനമിത്ര പുരസ്കാരം ഡോ. പി. ദിലീപ് കോട്ടേമ്പ്രം ഏറ്റുവാങ്ങി.

## Article Content

**ഇരിങ്ങണ്ണൂർ: [**പരിസ്ഥിതി സംരക്ഷണ രംഗത്തെ മികച്ച പ്രവർത്തനങ്ങൾ പരിഗണിച്ച് സംസ്ഥാന സർക്കാർ ഏർപ്പെടുത്തിയ 2025-ലെ വനമിത്ര പുരസ്കാരം ഡോ. പി. ദിലീപ് കോട്ടേമ്പ്രം ഏറ്റുവാങ്ങി.

വനംവകുപ്പ് മന്ത്രി ഷിബു ബേബി ജോണിൽ നിന്നാണ് അദ്ദേഹം പുരസ്കാരം സ്വീകരിച്ചത്. എടച്ചേരി പഞ്ചായത്തിലെ കോട്ടേമ്പ്രം സ്വദേശിയായ ഡോ. ദിലീപ്, മൊകേരി രാജീവ് ഗാന്ധി മെമ്മോറിയൽ ഹയർ സെക്കൻഡറി സ്കൂളിലെ സസ്യശാസ്ത്ര അധ്യാപകനും പ്രമുഖ പരിസ്ഥിതി പ്രവർത്തകനുമാണ്.

കോഴിക്കോട്, കണ്ണൂർ ജില്ലകളിലായി ആയിരക്കണക്കിന് മരങ്ങൾ നട്ടുപിടിപ്പിക്കുന്നതിനും അവ സംരക്ഷിക്കുന്നതിനും അദ്ദേഹം നേതൃത്വം നൽകിയിട്ടുണ്ട്. പരിസ്ഥിതി മേഖലയിൽ ലളിതമായ ആശയങ്ങളിലൂടെ ഒട്ടേറെ നൂതന പദ്ധതികൾ ആവിഷ്‌കരിച്ചു നടപ്പിലാക്കിയതാണ് അദ്ദേഹത്തെ ഈ വനമിത്ര പുരസ്കാരത്തിന് അർഹനാക്കിയത്.

പരിസ്ഥിതി രംഗത്തെ വലിയൊരു പുരസ്കാര നിര തന്നെയുള്ള വ്യക്തിത്വമാണ് ഡോ. പി. ദിലീപ്. 2022-ൽ കേരള സംസ്ഥാന ജൈവവൈവിധ്യ ബോർഡിന്റെ സംസ്ഥാന ഹരിത വ്യക്തി പുരസ്കാരം ഇദ്ദേഹത്തിന് ലഭിച്ചിരുന്നു.

മാതൃഭൂമി 'സീഡ്' കോർഡിനേറ്റർ കൂടിയായ ദിലീപിന് സംസ്ഥാന സ്പെഷ്യൽ ജൂറി പുരസ്കാരവും ബെസ്റ്റ് ടീച്ചർ കോർഡിനേറ്റർ അവാർഡും ലഭിച്ചിട്ടുണ്ട്. ഇതിനുപുറമെ ഹരിതഭൂമിക പുരസ്കാരം, പച്ചത്തുരുത്ത് പരിസ്ഥിതി പുനഃസ്ഥാപന പുരസ്കാരം, നന്മമരം ഗ്ലോബൽ ഫൗണ്ടേഷന്റെ 2023-ലെ സംസ്ഥാന പരിസ്ഥിതി അവാർഡ് എന്നിവയും അദ്ദേഹം സ്വന്തമാക്കിയിട്ടുണ്ട്. 

### Related Links & Sources
- [Original Story Source](https://nadapuram.truevisionnews.com/news/364206/dr-p-dilip-kottembram-received-the-state-vanamitra-award)