---
title: "ആയിരം വർഷം പഴക്കമുള്ള പൈതൃകപാത തേടി; കുഞ്ഞോം–പാനോം വനമേഖലയിൽ ചരിത്രാന്വേഷണം"
english_title: "Kunjom-Panom Heritage Route: NIT Students Document 1000-Year-Old Historic Forest Trail"
publisher: "nadapuramnews.in"
canonical_url: "https://nadapuram.truevisionnews.com/news/384562/kunjom-panom-heritage-route-historic-forest-trail-study"
published_at: "2026-09-28T16:24:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6aba47f2c5b55_kunjom-panom-heritage-route-historic-forest-trail-study.jpg"
keywords: ["Kunjom-Panom- Vilanganad Heritage Route", "Wayanad", "Kozhikode", "Pazhassi Raja", "NIT", "Heritage Study"]
---

# ആയിരം വർഷം പഴക്കമുള്ള പൈതൃകപാത തേടി; കുഞ്ഞോം–പാനോം വനമേഖലയിൽ ചരിത്രാന്വേഷണം

> **Lead Summary:** വിലങ്ങാട്: കോഴിക്കോട് ജില്ലയിലെ വിലങ്ങാടിന് സമീപമുള്ള പാനോം മുതൽ വയനാട്ടിലെ കുഞ്ഞോമിന് സമീപമുള്ള കുങ്കിച്ചിറ വരെ നീളുന്ന പുരാതന പൈതൃകപാതയുടെ ചരിത്രം രേഖപ്പെടുത്തുന്നതിനായി വസ്തുതാന്വേഷണ കൂടിക്കാഴ്ച നടന്നു.

## Article Content

വിലങ്ങാട്: കോഴിക്കോട് ജില്ലയിലെ വിലങ്ങാടിന് സമീപമുള്ള പാനോം മുതൽ വയനാട്ടിലെ കുഞ്ഞോമിന് സമീപമുള്ള കുങ്കിച്ചിറ വരെ നീളുന്ന പുരാതന പൈതൃകപാതയുടെ ചരിത്രം രേഖപ്പെടുത്തുന്നതിനായി വസ്തുതാന്വേഷണ കൂടിക്കാഴ്ച നടന്നു.

2026 സെപ്റ്റംബർ 26 ശനിയാഴ്ച കുങ്കി ഹെറിറ്റേജ് മ്യൂസിയത്തിൽ നടന്ന കൂടിക്കാഴ്ചയിൽ പ്രദേശത്തിന്റെ ചരിത്രം അറിയുന്ന തദ്ദേശസ്വയംഭരണ പ്രതിനിധികൾ, മുതിർന്ന പ്രദേശവാസികൾ, പഴയകാല അനുഭവസമ്പത്തുള്ളവർ, സർവേയർമാർ തുടങ്ങിയവർ പങ്കെടുത്തു. പാതയെക്കുറിച്ച് പഠനം നടത്തുന്ന കോഴിക്കോട് എൻഐടി എഞ്ചിനീയറിംഗ് കോളേജിലെ ആർക്കിടെക്റ്റ് വിദ്യാർഥികളുടെ സംഘവും ചരിത്രവിവരങ്ങളും പ്രാദേശിക അനുഭവങ്ങളും രേഖപ്പെടുത്താൻ എത്തി.

**

കൂടിക്കാഴ്ചയിൽ പങ്കുവെച്ച ചരിത്രവിവരങ്ങളും പ്രാദേശിക അറിവുകളും അനുസരിച്ച്, ഈ പാതയ്ക്ക് ഏകദേശം 1000 വർഷത്തെ പഴക്കമുണ്ടെന്നാണ് കരുതുന്നത്. ഇന്നത്തെ തൂണേരി ബ്ലോക്ക് പഞ്ചായത്ത് ഉൾപ്പെടുന്ന പ്രദേശവുമായി ബന്ധപ്പെട്ട അണിയാരത്തെ മൊയിലോം രാജവംശത്തിന്റെ കാലത്താണ് പാതയുടെ ആദ്യകാല ചരിത്രം ആരംഭിക്കുന്നതെന്നാണ് പറയുന്നത്.

പിന്നീട് പഴശ്ശിരാജയുടെ കാലത്ത് പാത കൂടുതൽ വികസിപ്പിച്ചെന്നും പ്രാദേശിക ചരിത്രവിവരങ്ങളിൽ പറയുന്നു.

നോർത്ത് വയനാട് ഫോറസ്റ്റ് ഡിവിഷനിലെ പേരിയ റേഞ്ചിലെ കുഞ്ഞോം ഫോറസ്റ്റ് സ്റ്റേഷൻ പരിധിയിൽ വരുന്ന കുഞ്ഞോം–പാനോം വിലങ്ങാട് വനത്തിലൂടെ ഏകദേശം 6.25 കിലോമീറ്ററാണ് പഴയ പാത കടന്നുപോകുന്നത്.

ഇതിൽ ഏകദേശം നാല് കിലോമീറ്റർ ഭാരവാഹനങ്ങൾ സഞ്ചരിക്കാൻ കഴിയുന്ന കൂപ്പു റോഡായിരുന്നുവെന്നും വിവിധ കാലഘട്ടങ്ങളിൽ യാത്ര, വ്യാപാരം, സൈനിക നീക്കം, ചരക്കുനീക്കം തുടങ്ങിയ ആവശ്യങ്ങൾക്ക് ഈ വഴി ഉപയോഗിച്ചിരുന്നുവെന്നും കൂടിക്കാഴ്ചയിൽ വിവരിച്ചു.

ഹൈദർ അലി, ടിപ്പു സുൽത്താൻ, പഴശ്ശിരാജ എന്നിവരുടെ കാലഘട്ടങ്ങളിലും പിന്നീട് ബ്രിട്ടീഷ് ഭരണകാലത്തും പാത ഉപയോഗിച്ചിരുന്നതായി പ്രാദേശിക ചരിത്രം പറയുന്നു. ടിപ്പുവിന്റെയും പഴശ്ശിയുടെയും സ്വാതന്ത്ര്യസമര പോരാട്ടങ്ങളുടെ സ്മാരകമായും ഈ പാതയെ കാണേണ്ടതുണ്ടെന്ന അഭിപ്രായവും കൂടിക്കാഴ്ചയിൽ ഉയർന്നു.

ഈ പ്രദേശത്തിന്റെ ചരിത്രം വാമൊഴികളിൽ മാത്രം ഒതുങ്ങുന്നതല്ലെന്നും യോഗത്തിൽ ചൂണ്ടിക്കാട്ടി. വില്യം ലോഗന്റെ മലബാർ മാന്വലിൽ വയനാട്ടിലെ പഴയ ദേശങ്ങളിലൊന്നായി കുഞ്ഞോം (Kunnom) എന്ന പേര് പരാമർശിക്കുന്നുണ്ട്.

മലബാറിന്റെ ചരിത്രം പറയുന്ന വടക്കൻപാട്ടുകളുടെ പാരമ്പര്യത്തിലും കുങ്കിയെക്കുറിച്ച് പരാമർശമുണ്ട്. കോഴിക്കോട് വളയം പഞ്ചായത്തിലെ ‘കുങ്കിയുള്ളതിൽ’ എന്ന സ്ഥലം കുങ്കിയുടെ യാത്രയ്ക്കിടെ താമസിച്ചിരുന്ന സ്ഥലമായി ഇന്നും അടയാളപ്പെടുത്തി വെക്കുന്നതായും യോഗത്തിൽ പറഞ്ഞു.

പഴയ വ്യാപാരപാത**

വയനാടിനെയും മലബാർ തീരപ്രദേശങ്ങളെയും ബന്ധിപ്പിച്ചിരുന്ന പ്രധാന വ്യാപാരപാതകളിലൊന്നായിരുന്നു ഇതെന്നാണ് പ്രാദേശിക ചരിത്രവിവരങ്ങൾ. വയനാട്ടിൽനിന്ന് കുരുമുളക്, ഏലം, അരി തുടങ്ങിയ കാർഷിക ഉൽപ്പന്നങ്ങൾ തീരപ്രദേശങ്ങളിലേക്ക് കൊണ്ടുപോയിരുന്നു. മറുവശത്ത് തലശ്ശേരി, വടകര, നാദാപുരം പ്രദേശങ്ങളിൽനിന്ന് ഉണക്കമീൻ, തേങ്ങ, വെളിച്ചെണ്ണ തുടങ്ങിയ സാധനങ്ങൾ വയനാട്ടിലേക്കും എത്തിയിരുന്നു.

ഏകദേശം 950 വർഷം പഴക്കമുള്ള കുഞ്ഞോം മസ്ജിദും കുഞ്ഞോം അങ്ങാടിയും ഈ പഴയ വ്യാപാരശൃംഖലയിലെ പ്രധാന കേന്ദ്രങ്ങളായിരുന്നുവെന്നും യോഗത്തിൽ വിലയിരുത്തി. അതിനാൽ ഇത് വെറുമൊരു വനപാതയായിരുന്നില്ലെന്നും മലയുടെ ഇരുവശങ്ങളിലുമുള്ള ജനങ്ങളെയും ചന്തകളെയും സമൂഹങ്ങളെയും ബന്ധിപ്പിച്ചിരുന്ന വഴിയായിരുന്നുവെന്നും പങ്കെടുത്തവർ ചൂണ്ടിക്കാട്ടി.

**വനത്തിനുള്ളിലെ പൈതൃക ശേഷിപ്പുകൾ**

പഴയ വനപാതയോട് ചേർന്നുള്ള മറ്റ് പൈതൃക ശേഷിപ്പുകളെക്കുറിച്ചും കൂടിക്കാഴ്ചയിൽ ചർച്ച നടന്നു. പഴശ്ശിരാജയുടെ സേനാനായകനായ തലക്കൽ ചന്തുവിന്റെ നേതൃത്വത്തിൽ ആയുധ, ആയോധന പരിശീലനം നടത്തിയിരുന്നതായി പ്രദേശവാസികൾ പറയുന്ന സ്ഥലവും ഇതിൽ ഉൾപ്പെടുന്നു. ഇതിന്റെ ചില ശേഷിപ്പുകൾ ഇന്നും വനത്തിനുള്ളിൽ കാണാനാകുമെന്നാണ് പറയുന്നത്.

ഒന്നോ രണ്ടോ നൂറ്റാണ്ടുകൾക്ക് മുമ്പ് മരണപ്പെട്ടതായി വിശ്വസിക്കപ്പെടുന്ന ഒരു സൂഫിവര്യന്റേതെന്ന് പറയപ്പെടുന്ന ഖബറിനെക്കുറിച്ചും വിവരങ്ങൾ പങ്കുവെച്ചു. സമീപപ്രദേശങ്ങളിൽ നിന്നുള്ളവർ ഇവിടെ എത്തി പ്രാർഥിക്കുന്ന പതിവുണ്ടായിരുന്നുവെന്നും സന്ദർശകർ ഖബറിന് മുകളിൽ ഓരോ ചെറിയ കല്ല് വയ്ക്കുന്നതും ആചാരമായിരുന്നുവെന്നും പറയുന്നു.

വർഷങ്ങൾ കഴിഞ്ഞപ്പോൾ കല്ലുകൾ കൂടിച്ചേർന്ന് ഖബർ ചെറിയ കല്ലറ പോലെയുള്ള രൂപത്തിലായെന്നും വിവരിച്ചു. കഴിഞ്ഞ 10–15 വർഷമായി വനത്തിലേക്കുള്ള പ്രവേശനം കൂടുതൽ നിയന്ത്രിക്കപ്പെട്ടതോടെ ഇവിടേക്കുള്ള സന്ദർശനം കുറഞ്ഞതായും യോഗത്തിൽ പറഞ്ഞു.

ഇത്തരം പൈതൃക കേന്ദ്രങ്ങളും പഴയ പാതയ്ക്കൊപ്പം ശരിയായ രീതിയിൽ രേഖപ്പെടുത്തി പഠിക്കേണ്ടതുണ്ടെന്നും അല്ലാത്തപക്ഷം വിലപ്പെട്ട പ്രാദേശിക ചരിത്രം കാലക്രമേണ നഷ്ടപ്പെടാൻ സാധ്യതയുണ്ടെന്നും യോഗത്തിൽ അഭിപ്രായപ്പെട്ടു.

**1991ലെ ശ്രമവും ഓർമയിൽ**

1991ൽ അന്നത്തെ തൊണ്ടർനാട് ഗ്രാമപഞ്ചായത്ത് പ്രസിഡന്റ് കുര്യാക്കോസിന്റെയും വൈസ് പ്രസിഡന്റ് പി.കെ. കുഞ്ഞബ്ദുള്ള ഹാജിയുടെയും നേതൃത്വത്തിൽ ഗ്രാമപഞ്ചായത്ത് നടത്തിയ ശ്രമങ്ങളും യോഗത്തിൽ ഓർമ്മിപ്പിച്ചു. പഞ്ചായത്ത് ഭരണസമിതി കുഞ്ഞോം മുതൽ കുങ്കിച്ചിറ വരെ റോഡ് നിർമിക്കുകയും അവിടെനിന്ന് വിലങ്ങാട് പാനോമിലേക്കുള്ള 6.25 കിലോമീറ്റർ വനപാതയിലൂടെ റോഡ് ബന്ധം സാധ്യമാക്കാനുള്ള ശ്രമങ്ങൾ നടത്തുകയും ചെയ്തിരുന്നു. ഈ റോഡിന് പഴശ്ശിരാജയുടെ പേര് നൽകുകയും ചെയ്തിരുന്നു.

**ചുരമില്ലാ ആകാശപ്പാതയുടെ സാധ്യത**

പഴയ ചരിത്രത്തെക്കുറിച്ചുള്ള ചർച്ചയ്ക്കൊപ്പം പാനോമിനെയും കുഞ്ഞോമിനെയും ബന്ധിപ്പിക്കുന്ന നിർദിഷ്ട പഴശ്ശിരാജ ചുരമില്ലാ ആകാശപ്പാതയെക്കുറിച്ചും യോഗത്തിൽ പ്രധാന ചർച്ച നടന്നു. വനത്തിന്റെ അടിത്തട്ടിലൂടെ സാധാരണ റോഡ് നിർമിക്കുന്നതിന് പകരം 6.25 കിലോമീറ്റർ വനമേഖലയിലൂടെ ഉയരപ്പാത നിർമിക്കാനുള്ള സാധ്യത പഠിക്കണമെന്നതാണ് ആശയം.

ആകാശപ്പാതയുടെ ഇരുവശങ്ങളിലും കോൺക്രീറ്റ് ബാരിക്കേഡുകൾ നിർമിച്ച് മാലിന്യം വലിച്ചെറിയുന്നതും വന്യജീവികൾക്ക് ഭക്ഷണം നൽകുന്നതും വാഹനങ്ങൾ നിർത്തി സെൽഫിയെടുക്കുന്നതും തടയണമെന്ന നിർദേശവും മുന്നോട്ടുവച്ചു.

പാത സിസിടിവി നിരീക്ഷണത്തിലാക്കുകയും വന്യജീവികളുടെ സ്വൈര്യജീവിതത്തിന് ഭംഗം വരുത്താതിരിക്കുകയും വേണമെന്നും നിർദേശിച്ചു. എന്നാൽ, പദ്ധതി സാധ്യമാക്കാൻ വിശദമായ സാങ്കേതിക, പരിസ്ഥിതി, വന്യജീവി പഠനങ്ങളും ആവശ്യമായ സർക്കാർ അനുമതികളും വേണ്ടിവരുമെന്നും യോഗത്തിൽ വ്യക്തമാക്കി.

വടകരയിൽനിന്നോ തലശ്ശേരിയിൽനിന്നോ വിലങ്ങാട്, കുഞ്ഞോം, മാനന്തവാടി വഴി മൈസൂരിലേക്കും ബെംഗളൂരുവിലേക്കും ഏറ്റവും ദൈർഘ്യം കുറഞ്ഞ ചുരമില്ലാപാത ഒരുക്കുക എന്നതാണ് ഇതിന്റെ വലിയ ലക്ഷ്യമെന്ന് യോഗത്തിൽ പറഞ്ഞു. വ്യാപാരത്തിനും ടൂറിസത്തിനും സഹായകമായ സാമ്പത്തിക ഇടനാഴിയായി ഇത് മാറാൻ കഴിയുമെന്നും അഭിപ്രായപ്പെട്ടു.

വനത്തിന്റെ ഇരുവശങ്ങളിലുമുള്ള ആദിവാസി സമൂഹങ്ങളുടെ ബന്ധം മെച്ചപ്പെടുത്താനും വിദ്യാഭ്യാസം, ചികിത്സ, തൊഴിൽ, വിപണി തുടങ്ങിയ ആവശ്യങ്ങൾക്കുള്ള യാത്ര എളുപ്പമാക്കാനും പാത സഹായകമാകുമെന്നാണ് യോഗത്തിൽ അഭിപ്രായപ്പെട്ടത്.

വയനാട്ടിലേക്കുള്ള അടിയന്തര, സുരക്ഷാസേനകളുടെ യാത്രയ്ക്കുള്ള അധികപാതയായും, പ്രത്യേകിച്ച് നാദാപുരം അരീക്കരക്കുന്നിലെ ബിഎസ്എഫ് യൂണിറ്റിന്റെ യാത്ര കൂടുതൽ എളുപ്പമാക്കുന്നതിനും പാത പ്രയോജനപ്പെടുമെന്ന കാര്യവും ചർച്ചയായി.

അതേസമയം, വനം, സ്വാഭാവിക നീരൊഴുക്ക്, വന്യജീവികളുടെ സഞ്ചാരം, പൈതൃക കേന്ദ്രങ്ങൾ എന്നിവ സംരക്ഷിക്കണമെന്ന കാര്യത്തിനും യോഗം പ്രാധാന്യം നൽകി.

**ചരിത്രം പങ്കുവെച്ചവർ**

തൊണ്ടർനാട് ഗ്രാമപഞ്ചായത്ത് പ്രസിഡന്റ് പ്രമോദ് എസ്.എം. കൂടിക്കാഴ്ച ഉദ്ഘാടനം ചെയ്തു. മാനന്തവാടി ബ്ലോക്ക് പഞ്ചായത്ത് മുൻ പ്രസിഡന്റ് സി. അബ്ദുൾ അഷ്റഫ് മുഖ്യപ്രഭാഷണം നടത്തി. തൊണ്ടർനാട് ഗ്രാമപഞ്ചായത്ത് വൈസ് പ്രസിഡന്റ് പ്രീത രാമൻ അധ്യക്ഷത വഹിച്ചു.

പഴശ്ശിരാജ ചുരമില്ലാപാത & റൂറൽ ഡെവലപ്മെന്റ് സൊസൈറ്റി ചെയർമാൻ ഷൗക്കത്ത് അലി എരോത്ത് കൂടിക്കാഴ്ച നിയന്ത്രിക്കുകയും വിവർത്തനം നടത്തുകയും ചെയ്തു. മുതിർന്ന നേതാവ് കെ.ടി. കുഞ്ഞികൃഷ്ണൻ മാഷ്, ജിജി ജോണി, പ്രദേശവാസിയായ എം.കെ. പോക്കർ എന്നിവർ പഴയ പാതയെക്കുറിച്ചും അതുമായി ബന്ധപ്പെട്ട ചരിത്രത്തെക്കുറിച്ചും വിശദമായി വിവരങ്ങൾ പങ്കുവെച്ചു.

ബ്ലോക്ക് പഞ്ചായത്ത് അംഗം അബ്ദുള്ള കേളോത്ത്, തൊണ്ടർനാട് സ്റ്റാൻഡിങ് കമ്മിറ്റി ചെയർമാൻ ആലിക്കുട്ടി ആറങ്ങാടൻ, ക്ഷേമകാര്യ സ്റ്റാൻഡിങ് കമ്മിറ്റി ചെയർപേഴ്സൺ ഷബീറ മൊയ്തു, ടീ ബോർഡ് അംഗം ഇ.പി. ശിവദാസൻ മാഷ്, വാർഡ് അംഗങ്ങളായ ഹാരിസ് വി., മമ്മൂട്ടി മെൻസ്‌വെയർ, ജോൺ നാമല, അലി പള്ളിക്കൽ, നൗഷാദ് പയിങ്ങോൽ വാണിമേൽ, ബഷീർ കുഞ്ഞോം എന്നിവരും സംസാരിച്ചു.

**NIT സംഘം വിവരങ്ങൾ രേഖപ്പെടുത്തി**

NITയിലെ പ്രൊഫ. കസ്തൂർബയുടെ മാർഗനിർദേശത്തിൽ യാഷ് പന്ധർപുരെ, മുഹമ്മദ് സാലിക്, ചമൻ, സിരി, ആയുഷ്, പാർഥവ് എന്നിവരടങ്ങിയ വിദ്യാർഥി സംഘമാണ് പഠനത്തിൽ പങ്കെടുക്കുന്നത്. കൂടിക്കാഴ്ചയിൽ പങ്കുവെച്ച മുഴുവൻ വിവരങ്ങളും അനുഭവങ്ങളും സംഘം റെക്കോർഡ് ചെയ്യുകയും രേഖപ്പെടുത്തുകയും ചെയ്തു.

തലമുറകളിലൂടെ കൈമാറിവന്ന ചരിത്രത്തിന്റെ വിവിധ ഭാഗങ്ങളെ ഒരുമിച്ച് ചേർക്കാൻ കൂടിക്കാഴ്ച സഹായിച്ചതായി വിലയിരുത്തി. പഴയ വനപാത, വ്യാപാരം, കുഞ്ഞോം മാർക്കറ്റ്, കുഞ്ഞോം മസ്ജിദ്, ഹൈദർ അലി, ടിപ്പു സുൽത്താൻ, പഴശ്ശിരാജ, ബ്രിട്ടീഷ് കാലഘട്ടം, സൂഫിവര്യന്റെ ഖബർ, മറ്റ് പൈതൃക ശേഷിപ്പുകൾ, വനത്തിന്റെ ഇരുവശങ്ങളിലുമുള്ള ജനങ്ങളുടെ ബന്ധം എന്നിവയെല്ലാം ഉൾപ്പെടുന്നതാണ് ഈ ചരിത്രമെന്ന് യോഗം ചൂണ്ടിക്കാട്ടി.

കുഞ്ഞോം വനത്തിന്റെ ഇരുവശങ്ങളെയും റോഡ് വഴി നേരിട്ട് ബന്ധിപ്പിക്കണമെന്ന ആവശ്യം ആറോ ഏഴോ പതിറ്റാണ്ടുകളായി പ്രദേശത്ത് ചർച്ച ചെയ്യപ്പെടുന്ന ഒന്നാണെന്നും കൂടിക്കാഴ്ചയിൽ രേഖപ്പെടുത്തി. ചരിത്രശേഷിപ്പുകളെക്കുറിച്ചുള്ള അവബോധം വരുംതലമുറയ്ക്ക് പകരുന്നതിനും പാതയുടെ ചരിത്രത്തെക്കുറിച്ചുള്ള തുടർപഠനത്തിനും നിർദിഷ്ട ആകാശപ്പാതയുടെ സാധ്യതാ പഠനത്തിനും ഈ ശ്രമം വഴിയൊരുക്കുമെന്ന പ്രതീക്ഷയും യോഗത്തിൽ പങ്കുവെച്ചു.

**English Summary:**

A fact-finding meeting was held at Kungi Heritage Museum on September 26, 2026, to document the history of the ancient heritage route connecting Panom near Vilanganad in Kozhikode district with Kunkichira near Kunjom in Wayanad. Local representatives, senior residents, surveyors and an NIT student team shared and recorded historical information. Local accounts suggest the route may be around 1,000 years old and was used for travel, trade, military movements and transportation. The meeting also discussed heritage remains and the proposed Pazhassi Raja elevated route through the forest, along with the need for technical, environmental and wildlife studies and government approvals.

### Related Links & Sources
- [Original Story Source](https://nadapuram.truevisionnews.com/news/384562/kunjom-panom-heritage-route-historic-forest-trail-study)